पोखरा, ३० असार । लामो समयदेखी मार्सल आर्ट खेलकूदमा क्रियाशिल युवाहरुको संयुक्त लगानीमा पोखरा महानगपालिका–१ बगर स्थित माथिल्लो क्याम्पसगेट नजिक जिम टाउन स्पोर्टस् एकेडेमी व्यायामशाला सञ्चालनमा आएको छ ।
शारीरिक, मानसिक तथा सामाजिक स्वास्थ्यका लागि मान जीवनमा व्यायामको महत्व रहेको बताउँदै युवा खेलकूदकर्मीहरु नविन आचार्य, गोविन्द मल्ल, बलराम सुवेदी र बामदेव सुवेदीको रु दुई करोड लगानीमा सो स्पोर्टसे एकेडेमी सञ्चालनमा ल्याईएको हो । अमेरिकी ब्राण्डका बडी विल्डीङका मेसिनहरुको प्रयोगबाट दक्ष ट्रेनरबाट व्यायाम गराइने सञ्चालक बलराम सुवेदीले बताए ।
सो व्यायामशालामा एकपटकका १०० जनाले व्यायाम गर्न मिल्ने र हाल १० जना प्रशिक्षक रहेको सुवेदीले बताए । खेलकूदका साथसाथै शारीरिक स्वास्थ्यका लागि पनि व्यायाम अपरिहार्य रहेको बताउँदै अर्का सञ्चालक नविन आचार्यले केही देशव्यापी रुपमा शाखा विस्तार गर्ने योजना रहेको सुनाए ।
‘हेल्थलाई फोकस गरेर विशेष ट्रेनर राखेर सेवा दिन्छौँ। स्वस्थ नागरिकबाट मात्र देशको समृद्धि सम्भव छ।’ आचार्यले भने ।
सो व्यायामशालाको भोली असार ३१ गते गण्डकी प्रदेशका मुख्यमन्त्री पृथ्वीसुब्बा गुरुङले औपचारिक उद्घाटन गर्ने कार्यक्रम रहेको बताईन्छ ।
