कृष्ण दवाडी
पोखरा,५ असार । युवा तथा खेलकूदमन्त्री जगतबहादुर विश्वकर्माले खेल क्षेत्रको प्रगति बिना देशको समृद्धि सम्भव नरहेकाले खेल क्षेत्रलाई सरकारले प्राथमिकतामा राखेको बताएका छन् ।
माछापुच्छ्रे गाउँपालिकामा आजबाट शुरु भएको विद्यालयस्तरीय खेलकूद प्रतियोगिताÔराष्ट्रपति रनिङ शिल्ड’ को उद्घाटन गर्दै उनले खेलकूदको विकासका लागि देशका सातवटै प्रदेशमा अन्तर्राष्ट्रियस्तरको रङ्गशाला र ७५३ पालिकामा खेल ग्राम निर्माण गर्ने योजनाका साथ सरकार अघि बढेको बताए ।
देशमा अन्तर्राष्ट्रिस्तरको प्रतियोगिता आयोजना गर्नेको लागि अझ पनि व्यवस्थित रङ्गशाला नभएको बताउँदै मन्त्री विश्वकर्माले भने,‘काठमाण्डौ उपत्यकामा अन्तर्राष्ट्रियस्तरको खेलकूद परिसर, सातै प्रदेशमा अन्तर्राष्ट्रिय प्रतियोगिता गर्न मिल्ने एक÷एक वटा रङ्गशाला र ७५३ वटै स्थानीय तहमा दीर्घकालिन महत्वको एउटा ÷एउटा खेल ग्राम निर्माण गर्ने योजनामा सरकार छ।’
मन्त्री विश्वकर्माले खेलाडी जन्मने अर्को थलो विद्यालयको खेल मैदान भएकाले हरेक विद्यालयको खेलमैदान स्तरोन्नती गर्ने र प्रत्येक विद्यालयमा एक जना खेल शिक्षकको व्यवस्था गर्ने नीति अनुसार सरकारले आगामी वर्ष २०७६।०७७ को बजेटमा व्यवस्था गर्नु खेल क्षेत्रको लागि खुशीको कुरा भएको उल्लेख गरे ।
विद्यालयस्तरमा खेलकूदलाई पनि पठनपाठनभित्र समावेश गरेर खेल क्षेत्रको विकासको वातावरण बनाउने सोच सरकारको रहेको उनले स्पष्ट पारे । मन्त्री विश्वकर्माले विद्यालयतहबाट खेलाडीहरु उत्पादन गर्ने, नयाँ प्रतिभा खोजी गर्ने, प्रतिभा संरक्षण गर्ने र उनीहरुको खेल क्षेत्रमा विकास गर्नको लागि पालिका, जिल्ला, प्रदेश तथा केन्द्रमा राष्ट्रपति रनिङ शिल्ड प्रतियोगिता गर्न शुरु गरिएको बताए ।
गाउँपालिका प्रमुख कर्ण गुरुङले प्रतियोगितामा छात्र÷छात्रा भलिबल, कवड्डी, एथलेटिक्स, हाईजम्म, लङजम्म, त्रिपलजम्म,सटफुट, ज्याभिलन थ्रो समावेश गरिएको र सामूदायिक १० र संस्थागत १ गरी ११ विद्यालयका करीव ५०० विद्यार्थीले प्रतिष्पर्धा गर्ने दिए । प्रतियोगिता यही असार ६ गतेसम्म सञ्चालन हुनेछ ।
गाउँपालिका प्रमुख गुरुङले प्रतियोगिताका बिजेताहरुलाई स्वर्ण, रजत र कास्य पदक तथा उत्कृष्ट तीन भित्र पर्ने विद्यालयलाई रु. १५ हजार, रु. १० हजार तथा रु सात हजार ५०० सय पुरस्कार प्रदान गरिने जानकारी दिए ।
कार्यक्रममा वडा नं ४ का वडाध्यक्ष एवम् प्रतियोगिता सदस्य पूर्णबहादुर शाही, गाउँपालिकाका प्रमुख प्रशासकीय अधिकृत नारायण सापकोटा तथा महेन्द्र माविका प्रधानाध्यापक गोविन्द अधिकारी लगायतले प्रतियोगिताको बारेमा भनाई राखेका थिए ।
प्रतियोगिता अन्तर्गत आज भएको एक हजार ५०० मीटर छात्र छात्रा दौडमा छात्रतर्फ ज्ञान ज्योती बोर्डिङका विबेक परियार प्रथम, पृथ्वीनारायण माविका सुनिल विक द्धितीय र उदय माविका देवेन्द्र विक तृतीय भए । त्यस्तै छात्रा तर्फ पृथ्वीनाराय माविका विनिता भण्डारी प्रथम, उदय माविका विनु विक द्धितीय र माछापुच्छ्रे माविका सुष्मा कुँबर तृतीय भएको गाउँपालिका उपप्रमुख कृष्ण दवाडीले जानकारी दिईन् ।
शुक्रबार भलिबलतर्फ शारदा मावि र निष्पक्ष माविबीच फाईन तथा शुक्ला गण्डकी र पृथ्वीनारायण माविकाबीच तृतीय स्थानका लागि हुँदैछ । त्यसैगरी छात्रातर्फ निश्पक्ष मावि र पृथ्वीनारायण मावि र महेन्द्र मावि र बराह माविबीच तृतीय स्थानका लागि प्रतिष्पर्धा हुनेछ । एथेलेटिक्स र कवड्डीको पनि फाईनल खेल शुक्रबारनै हुने छ ।
