रोल्पा । रोल्पाको त्रिवेणी गाउँपालिका ७ मा बेवारिसे बम पड्किँदा चार बालबालिकाको मृत्यु भएको छ । बिहीबार साँझ ६ बजे त्रिवेणी गाउँपालिकाको गैरी गाउँ स्थित मैतीगातिनामा बम विस्फोट हुँदा ४ जना बालबालिकाको ज्यान गएको जिल्ला प्रहरी कार्यालय रोल्पाले जनाएको छ ।
मृत्यु हुनेमध्ये दुई बालबालिका एकै परिवारका रहेको प्रहरीले बताएको छ । मृत्यु हुनेहरुमा ५ वर्षीय विजय खत्री, ११ वर्षीया विमला खत्री, ११ वर्षीय गौरव नेपाली र १३ वर्षीय नेखीराम डाँगी छन् ।
बाख्रा चराएर घर फर्किरहेका बालबालिका बम बिस्फोटमा परेको बताइएको छ । शव क्षतविक्षत अवस्थामा रहेको र शव नजिकै अर्को बम समेत भेटिएको प्रहरीले जनाएको छ ।
