अन्तर्राष्ट्रिय विमानस्थलले लगानीकर्ता उत्साहित, अमरसिंहचोकमा तारे होटल बन्दै

639
lekali chulo ghar pokhara

गोकुल बानियाँ , पोखरा १९ पुस । पोखरा क्षेत्रीय अन्तर्राष्ट्रिय विमानस्थल निर्माणको चरणमा पुगेपछि त्यस आसपास पर्यटकिय पूर्वाधार निर्माणको क्रम सुरु भएको छ । यसअघि पोखराको लेकसाइडलाई मात्रै केन्द्र बनाएर होटल रेष्टुरेन्ट थपिदै आएकोमा अब नयाँ विमानस्थललाई लक्षित गरी स्तरीय होटलमा लगानी हुन थालेको छ ।

हाल निर्माणको चरणमा पुगेको अन्तर्राष्ट्रिय विमानस्थल आसपास चाउथेमा रोयल पाम र फुलवारीमा पाँच तारे फुलवारी रिसोर्ट सञ्चालनमा रहेकोमा अब अमरसिंहचोकमा पनि अन्तर्राष्ट्रिय स्तरको सेवा सहित होटल सञ्चालनमा ल्याउने तयारी भैरहेको छ ।

लेकसाइडमा बर्षेनी १५ देखि २० वटा होटल थपिदै गएपनि पोखराका अन्य क्षेत्रमा पर्यटकिय स्तरका होटल खुल्न सकेका थिएनन् । नयाँ विमानस्थलले लगानीकर्तामा उर्जा थपिएपछि त्यस आसपासका क्षेत्रमा स्तरीय होटलमा लगानी गर्न सुरु भएको हो ।

लगानीकर्ता मिन बहादुर गुरुङले होटल टास्क इन्टरनेशनलको नाममा अन्तर्राष्ट्रिय स्तरको सेवा सुविधा सहित तीन तारे होटल सञ्चालनमा ल्याउने तयारी गरेका हुन् । होटल पोखरा १० अमरसिंहचोक नजिकै निर्माणको चरणमा छ । आगामी बडादशै सम्ममा सञ्चालन गर्ने लक्ष्य राखिएको होटलमा तत्कालका लागि पर्यटकिय स्तरको सेवा सुविधा उपलब्ध गराउने र निकट भविश्यमै तीन तारे होटलको रुपमा विस्तार गर्ने लक्ष्य राखिएको छ ।

निर्माणधिन होटल सञ्चालनमा आएपछि ३० वटा कोठा हुन्छन् । जसमध्ये १२ वटा डिलक्स, १६ वटा स्वीट र २ वटा सुपर स्वीट रुम हुने सञ्चालक गुरुङले बताए । होटलको टपमा भ्यू टावर सहित रुफ टप रेष्टुरेन्ट हुनेछ । जहांबाट पोखरा भ्याली र आसपासका मनोरम दृष्य देख्न सकिन्छ । साथै राउण्ड टेवल सहितको ३५ जना क्षमताको दुई कन्फ्रेन्स हल र ५० सीट क्षमताको सेमिनार हल हुने छ । त्यसैगरी लामो समय बस्ने पाँहुनाका लागि २ वटा अपार्टमेन्ट रहनेछ । होटलमा अण्डर ग्राउण्ड पार्किङ र लिफ्टको सुविधा पनि छ ।

होटल सञ्चालनमा ल्याउन लागिएको क्षेत्र हाल पूर्ण रुपमा आवास क्षेत्रको रुपमा चिनिन्छ । यो क्षेत्रमा अहिलेसम्म कुनैपनि स्तरीय होटल थिएनन् । ‘ पोखराका हरेक क्षेत्र पर्यटकिय क्षेत्र हुन् त्यसैले लेकसाइडमा मात्रै केन्द्रित सेवासुविधा हामीले अन्य क्षेत्रबाट दिने कोषिस गरेका छौ । ’ सञ्चालक गुरुङले भने । अन्तर्राष्ट्रिय विमानस्थललाई लक्षित गरेर सो क्षेत्रमा होटल सञ्चालन गर्न लागेको उनले बताए । ‘ यो होटलको भविश्य अन्तर्राष्ट्रिय विमानस्थलसँग पनि जोडिएको छ, ’ उनले भने ‘ राजमार्गसँगै जोडिएकाले यो होटल सञ्चालनमा आएपछि ट्याक्सी चढेर होटल खोज्दै लेकसाइड सम्म पुग्न पनि पर्दैन । ’

सञ्चालक गौरी गुरुङले लेकसाइड बाहेक पोखराका अन्य क्षेत्रमा पनि पर्यटकिय स्तरका होटल रेष्टुरेन्ट खोल्नुपर्ने बताइन् । होटल टास्क इन्टरनेशनलले स्वदेशी र विदेशी दुबै पर्यटकलाई लक्षित गरी स्तरीय सेवा प्रदान गर्ने उनले बताइन् । उनका अनुसार हाल झण्डै पाँच करोड लागतमा लेकाली चुलो र टास्क ट्राभल्स एण्ड टुर्स सञ्चालनमा आएको छ भने होटल सञ्चालनमा ल्याउदा झण्डै २५ करोड लागत पुग्नेछ ।

लेकाली चुलो र टास्क ट्राभल्स एण्ड टुर्समा हाल ३० जनाले प्रत्यक्ष रोजगारी पाएको र होटल पूर्ण रुपमा सञ्चालनमा आएपछि ६५ जनालाई रोजगारी दिन सकिने सञ्चालकले बताए ।

Leave a reply

Your email address will not be published. Required fields are marked *

Find us on Facebook